Kocha wa timu ya taifa ya Morocco, Walid Regragui, amewatahadharisha wachezaji wake kutojiamini kupita kiasi kuelekea mchezo wa hatua ya 16 bora dhidi ya Tanzania utakaopigwa Jumapili nchini Morocco. Licha ya Morocco kuingia uwanjani kama timu inayopewa nafasi kubwa ya kushinda, Regragui amesisitiza kuwa ukosefu wa unyenyekevu umekuwa ukiwagharimu huko nyuma.
Tanzania, ambayo imetinga hatua hiyo kama mshindi wa tatu bora (best loser) ikiwa na alama mbili pekee, inatazamwa kama timu isiyo na nguvu, lakini Regragui amesema kuwa kutoheshimu wapinzani ni mtego ambao hataki timu yake iuangukie. Alikumbusha kuwa Morocco haijatwaa ubingwa wa AFCON kwa miaka 50 sasa (tangu 1976), na mara nyingi wamekuwa wakitolewa na timu zisizopewa nafasi.
“Kazi yangu ni kuhakikisha tunabaki na miguu yetu ardhini,” alisema Regragui. “Tutaheshimu timu ya Tanzania; ni timu inayokua, yenye miundombinu inayostawi na ligi yenye klabu mbili kubwa (Simba na Yanga) na wachezaji wazuri wa ndani. Hatutawapa nafasi ya kuleta mshangao.”
Tanzania inashiriki AFCON kwa mara ya nne pekee na bado haijawahi kushinda mchezo hata mmoja katika fainali hizo tangu ilipoanza kushiriki mwaka 1980. Hata hivyo, makocha na wachambuzi wengi wanatazama mchezo huu kama fursa kwa “Taifa Stars” kuweka historia mpya ikiwa Morocco wataingia uwanjani kwa dharau.
