Mshambuliaji tegemeo wa Barcelona, Raphinha, atalazimika kukaa nje ya uwanja kwa takriban wiki tano, jambo litakalofanya akose michezo yote miwili ya robo fainali ya Ligi ya Mabingwa Ulaya (UCL) dhidi ya Atletico Madrid mwezi ujao.
Raphinha (29) alipata jeraha la misuli ya paja (hamstring) siku ya Alhamisi wakati akiitumikia timu yake ya taifa ya Brazil katika mchezo wa kirafiki dhidi ya Ufaransa, ambapo Brazil walipoteza kwa mabao 2-1 mjini Foxborough.
Klabu ya Barcelona imethibitisha kupitia taarifa rasmi kuwa mchezaji huyo anarejea nchini Uhispania kuanza matibabu mara moja.
Kukosekana kwa Raphinha ni pigo zito kwa kocha na mashabiki wa Barcelona kutokana na fomu yake bora msimu huu:
- Mabao: Amefunga jumla ya mabao 19 katika mashindano yote msimu huu.
- UCL: Aling’ara sana katika hatua ya 16 bora kwa kufunga mabao mawili kwenye ushindi mnono wa 7-2 dhidi ya Newcastle United.
