Rais wa zamani wa Marekani, Barack Obama, amesema matokeo ya Uchaguzi nchini humo yametuma ujumbe ulio wazi kwamba Wananchi wanataka siasa zinazowaunganisha badala ya kuwagawa, pamoja na viongozi wenye uwezo wa kutoa suluhisho la vitendo kwa changamoto zinazowakabili.
Katika kauli yake, Obama amewapongeza Wagombea waliojitokeza kuwania nafasi mbalimbali za uongozi katika maeneo tofauti nchini Marekani, akibainisha kuwa ushindi huo umewezekana kutokana na juhudi za Wagombea walioweza kushindana hata katika maeneo yaliyokuwa yakichukuliwa kuwa ngome imara za wapinzani.
Amesema Wagombea hao walitoka katika mazingira tofauti na kuwakilisha mitazamo mbalimbali ya kisiasa, lakini waliunganishwa na maadili ya pamoja, imani katika utumishi wa umma na dhamira ya kuweka mbele maslahi ya wananchi wanaowawakilisha.
Aidha, Obama ametoa shukrani kwa maelfu ya maafisa wa uchaguzi na wajitolea kutoka vyama vyote viwili vikuu vya siasa nchini humo kwa mchango wao katika kuhakikisha uchaguzi unafanyika kwa utulivu na kufanikisha moja ya majukumu muhimu katika demokrasia ya Marekani.
Akizungumzia hatua zinazofuata, Obama amesema licha ya utawala uliopo kubakiza miaka miwili madarakani, ni muhimu kuchukua hatua, kufanya mabadiliko pale inapowezekana, kuzuia madhara zaidi na kuweka msingi imara kwa ajili ya mustakabali wa baadaye.
Kauli hiyo inaweka msisitizo katika umuhimu wa mshikamano wa kitaifa, uwajibikaji wa viongozi na siasa zinazotanguliza maslahi ya wananchi.
