Klabu ya Newcastle United imethibitisha kuwa beki wake mkongwe na nahodha wa zamani, Kieran Trippier, ataondoka klabuni hapo mara baada ya mkataba wake kumalizika msimu huu wa kiangazi. Trippier, mwenye umri wa miaka 35, anahitimisha safari yake ya miaka minne na nusu ndani ya dimba la St. James’ Park, safari iliyopambwa na mafanikio makubwa tangu alipojiunga akitokea Atletico Madrid mwaka 2022. Beki huyo wa zamani wa timu ya taifa ya Uingereza ameelezea hisia zake kwa kusema kuwa Newcastle ndipo mahali alipohisi kama nyumbani zaidi katika maisha yake ya soka, akisisitiza kuwa kutwaa taji la Kombe la Ligi msimu uliopita kulikuwa tukio la kipekee na bora zaidi katika taaluma yake.
Ushawishi wa Trippier ndani ya Newcastle ulikuwa wa papo hapo, ambapo msimu wa 2022-23 ulikuwa wa kihistoria baada ya kuiongoza timu hiyo kumaliza katika nafasi ya nne kwenye Ligi Kuu ya Uingereza. Mafanikio hayo yaliirejesha Newcastle katika mashindano ya Ulaya kwa mara ya kwanza baada ya muongo mmoja, jambo lililobadilisha taswira ya klabu hiyo duniani. Kocha wa Newcastle, Eddie Howe, amemmnyagia sifa Trippier akisema kuwa tangu siku ya kwanza alipokanyaga klabuni hapo, alisaidia kupandisha viwango vya utendaji na kubadilisha mwelekeo wa timu kuelekea mafanikio makubwa zaidi.
Safari ya Trippier, ambaye amewahi kuzichezea klabu za Burnley na Tottenham Hotspur, inafika tamati huku akiacha alama isiyofutika kama mchezaji aliyekuwa injini ya mabadiliko ya Newcastle chini ya uongozi mpya. Ingawa bado hajaweka wazi kituo chake kinachofuata, mashabiki wa “The Magpies” watamkumbuka kama kiongozi aliyewapa heshima ya kutwaa taji la kwanza la ndani baada ya miaka 70 ya ukame. Kuondoka kwake kunaashiria mwanzo wa mabadiliko mengine ndani ya kikosi cha Eddie Howe wakati wakijiandaa kwa msimu ujao bila mmoja wa wachezaji wao wenye ushawishi mkubwa zaidi katika vyumba vya kubadilishia nguo.
