Aliyekuwa Rais wa Jamhuri ya Kidemokrasia ya Kongo, Joseph Kabila, ametajwa kuwa kiongozi wa muungano mpya wa kisiasa na kijeshi. Hatua hii imebainika kupitia tamko rasmi lililosomwa katika mji wa Goma uliopo mashariki mwa nchi hiyo.
Kundi hilo, linalofahamika kama Front for the Refoundation of the Nation (FRN), linajumuisha wanachama waliokubaliana kuunganisha juhudi na rasilimali zao ili kufanya kazi pamoja. Akisoma taarifa hiyo, Claude Ibalanky—mshauri na balozi wa zamani wa Rais Félix Tshisekedi aliyetangaza kujiunga na muungano huo—alieleza kuwa dhumuni lao kuu ni kuikomboa nchi.
Waanzilishi wa muungano huo walirejelea Ibara ya 64 ya Katiba ya Kongo, inayowapa raia haki na wajibu wa kupinga kiongozi au kundi lolote linalotwaa mamlaka kwa nguvu au kuongoza kwa kukiuka sheria mama ya nchi. FRN ilisisitiza kuwa ipo tayari kutumia mbinu mbalimbali, ikiwa ni pamoja na matumizi ya nguvu za kijeshi, ili kuondoa kile ilichokiita utawala wa kidhalimu na kuweka mfumo mpya wa uongozi.
Katika muundo wa uongozi wa mpito uliotangazwa, Bw. Kabila alichaguliwa kwa kauli moja kuwa kiongozi mkuu wa FRN wakati maandalizi ya kuunda taasisi rasmi za kundi hilo yakiendelea. Tangazo hili limekuja siku chache baada ya Bw. Kabila kutoa hotuba kwa taifa akiahidi kutoa mwongozo wa jinsi wananchi wanavyoweza kuinusuru nchi yao.
Katika hotuba yake hiyo, Bw. Kabila aliikosoa vikali serikali ya Rais Tshisekedi kwa kupuuza ushauri wake wa kumaliza migogoro ya mashariki mwa DRC, kuvunja misingi ya katiba, kurudisha nyuma uchumi, kushindwa kuimarisha ulinzi, na kuwakamata hovyo wanasiasa wa upinzani pamoja na wanajeshi. Serikali ya sasa bado haijatoa maelezo yoyote kujibu tuhuma hizo.
Hatua hii mpya inaonyesha wazi kujitosa kwa Bw. Kabila katika harakati za silaha dhidi ya serikali ya Kinshasa. Baada ya kuongoza DRC kuanzia mwaka 2001 hadi 2019 na kukabidhi madaraka kwa Bw. Tshisekedi, rais huyo wa zamani alikaa kimya kwa muda mrefu, lakini sasa ameibuka tena akiwa mpinzani mkubwa wa serikali iliyopo.
