Arsenal imepata pigo kubwa la majeraha baada ya kiungo wao muhimu, Declan Rice, kutarajiwa kukosa mechi ya Ligi Kuu England dhidi ya Aston Villa itakayopigwa Jumanne kwenye Uwanja wa Emirates. Rice alipata tatizo la goti katika ushindi wa 2-1 dhidi ya Brighton, ingawa aliweza kumaliza dakika 90 za mchezo huo.
Kwa mujibu wa ripoti, Rice alikuwa na matumaini ya kucheza lakini benchi la ufundi limeamua kutomhatarisha ili kuepuka kuzidisha jeraha. Ingawa hatarajiwi kukaa nje kwa muda mrefu, kukosekana kwake ni pigo kwa kocha Mikel Arteta, hasa ikizingatiwa umuhimu wa mechi hiyo kwenye mbio za ubingwa.
Kwa upande wa habari njema, Arsenal inaweza kuimarika kwa kurejea kwa Jurrien Timber na Ben White, wanaokaribia kupona majeraha yao. Hata hivyo, mechi dhidi ya Villa itakuwa changamoto kubwa, hasa baada ya Arsenal kupoteza 2-1 walipokutana awali mwezi Desemba.
Aston Villa wanaingia kwenye mchezo huo wakiwa kwenye mwendo mzuri wa ushindi, huku ushindi wao ukiweza kuwafanya wafikie alama sawa na Arsenal kileleni mwa msimamo wa ligi.
