Kundi la waasi wa Houthi (Ansar Allah) limedai kufanya mashambulizi siku ya Alhamisi dhidi ya viwanja vya ndege na vituo vya mafuta nchini Saudi Arabia—ikiwemo viwanda vya kusafisha mafuta vya Ras Tanura na Rabigh, pamoja na Uwanja wa Ndege wa Kimataifa wa King Khalid mjini Riyadh. Hata hivyo, viongozi wa Saudi Arabia hawakuthibitisha mara moja madai hayo.
Wakati huo huo, majeshi ya muungano yanayoongozwa na Saudi Arabia yalitangaza kufanikiwa kutungua na kuangamiza makombora mawili ya balestiki yaliyokuwa yakielekezwa mji mkuu, Riyadh.
Kulingana na shirika la habari la Reuters, waasi hao pia walidai kushambulia kituo cha mafuta cha kampuni ya Aramco huko Abqaiq na Uwanja wa Ndege wa Kimataifa wa King Fahd uliopo Dammam, upande wa mashariki mwa nchi hiyo.
Shirika la habari la AFP liliripoti kusikika kwa milipuko zaidi ya minane katika mji wa Riyadh, huku wananchi wakipata taarifa za tahadhari kwenye simu zao zikiwaonya dhidi ya mashambulizi ya angani.
Mamlaka inayohusika na Ulinzi wa Raia nchini Saudi Arabia ilikuwa imetoa tahadhari ya hatari katika maeneo ya Riyadh, Al-Kharj na Najran, kabla ya kuiondoa muda mfupi baadaye.
Mapema Alhamisi hiyo, msemaji wa muungano huo, Turki al-Maliki, alithibitisha kuwa walizuia kombora jingine la balestiki lililokuwa limeelekezwa na Wahouthi upande wa mashariki mwa nchi.
Matukio haya yanajiri siku moja baada ya Houthi kutangaza kuwa walilenga Wizara ya Ulinzi ya Saudi Arabia, kiwanda cha mafuta cha Ras Tanura na Uwanja wa Ndege wa Abha, ikionyesha kushika kasi kwa uadui na mashambulizi kati ya pande hizo mbili.
